【Chill人生活】港產狗界僱傭兵　靠個鼻保護英超球星

Chill人生活，顧名思義，人是主角；不過今次主角並不單是人，牠是港產搜爆狗女Ox，還有她的主人兼訓練教頭鄧曄熙。每年5、6月，是Ox執勤的旺季，來自世界各地的郵輪，趁暑假前泊港口岸補給，一櫃櫃物資運上船前，差不多都要經過她的靈鼻左聞右聞「檢疫」，確保安全。「Ox係台柱，每次行動都一定有佢份」。白棕色的史賓格犬，耳朵長長一面傻勁，卻出名嗅覺靈敏。去年底美國航空母艦列根號訪港、英超亞洲杯在港舉行，還未計富豪和中外名人秘訪香港聘用私人保安，都見Ox狗蹤，名副其實攞正牌的專業狗仔隊！

記者 呂麗嬋

「要成為搜爆犬，除咗要嗅覺靈敏，最重要係要鍾意追波」。曾任漁護署犬隻訓練導師的犬學堂創辦人鄧曄熙說。位於元朗水尾村的犬學堂，是香港唯一私營警衛犬訓練基地，專門訓練如屋苑巡邏犬及搜爆犬等專業工作犬。偌大的空地，停泊了新購入的退役巴士、搭建完整的模擬貨倉，以及郵輪碼頭常見的大型運貨鏟車。穿着一身黑衣的訓練員，正拖着Ox在搜巴士：沿着車身順時針用鼻索，每個位置無一遺漏，直至聞到「有料到」，即坐定定長尾猛搖，烚熟狗頭望着訓練員，等他拋出波波，然後二話不說喪追！

「最初訓練都係要由搵波開始，所以隻狗係咪鍾意追波好緊要，到習慣咗，就由波變有特殊味道的炸藥替代品，工作人員預先將餌藏好，每日早晚訓練兩次」。基地模擬實景，鏟車一開動轟轟作響，鄧說訓練時，這些逼真的環境嘈音不可或缺。「最主要係等佢哋習慣，到臨場做搜爆檢查時，表現就可以穩定啲」。養兵千日，用在一朝，即將3歲的Ox搜爆實戰經驗豐富，早前列根號留港5日4夜補給物資，5隻搜爆犬包括牠，就長駐西環碼頭輪流當值，出入的人和貨，統統需通過狗鼻「檢疫」才能內進。

此外，上年7月英超亞洲杯在港舉行，四支英超球隊包括利物浦訪港，吸引大批市民追星，英超方面就要求保安公司在旅遊巴每次出車前，都要經搜爆犬檢查，確定安全，才讓球員登車。「啲國際球星個個身價不菲，保安要求好嚴格，隨隊工作人員預先到港實地考察，又親身嚟到呢度睇搜爆犬接受訓練嘅情況」。雖然歐洲出現恐襲風潮，但保安公司Plan B董事梁嘉勁直言，香港恐襲風險不高，但私人搜爆犬近年需求殷切，或與大眾保安意識提高了有關。